"A QUE SABE A LÚA?"

Rematamos esta semana cun conto ben coñecido "A que sabe a Lua?", nunha fermosa presentación feita pola profe Natalia e que quere compartir con nós. 

Unha linda versión para desfrutar no día de hoxe.

Moitas Grazas Natalia. 

E despois do conto, imos movernos coas novas propostas de Psicomotricidade que nos enviaron as profes Natalia e Rosi. Desfrutádeas moito.

 

Propostas que tamén podedes atopar en "Tarefas na Casa" en Psicomotricidade 8.
Nenas e nenos de Ed. Infantil 6ºB

"A NOITE DAS MUDANZAS"

O último conto que imos traballar nesta semana é “A noite das Mudanzas”, escrito por Pep Bruno e que nos achega aos animais da granxa dunha maneira divertida.

Como tarefa, a proposta para hoxe é a seguinte:
1º- Escribir o título do conto
2º- Debuxar unha granxa
3º- Facer en collage a lo menos 3 dos animais que saen no conto e pegalos na granxa
Utilizade materias diversos para facelos: algodón, papel arrugado, tiras de papeis de cores, tea, la…
4º- Anotar se este conto me gusta, se me gusta solo un pouco ou non me gusta nada
Aquí tendes a portada do conto e o modelo co título e valoración.

Nenas e nenos de Ed. Infantil 6ºB

"OS SEIS BARBUDOS"

Estamos a mércores, no medio da semana, e toca un conto que nos fala de como poden enganar as aparencias e crear prexuízos inxustos. Trátase do conto “Os seis Barbudos” escrito por Mar Pavón.
Desfrutádeo.

En canto a tarefa proposta a partir do conto:
1º- Escribir o título do conto
2º- Facer o debuxo da páxina que máis vos guste
3º- Anotar se este conto me gusta, se me gusta solo un pouco ou non me gusta nada
Aquí tendes a portada do conto e o modelo co título e valoración.

Nenas e nenos de Ed. Infantil 6ºB

"CHIBOS CHIBÓNS"

Seguimos co conto “Chibos Chibóns”, un conto popular adaptado por Olalla González e ilustrado por Federico Fernández. 

Aquí temos un vídeo que esperamos que vos guste.

E a tarefa proposta para hoxe consiste en:

1º- Escribir o título do conto

2º- Debuxar unha paisaxe de montaña

3º- Facer noutro papel os 3 chibos: grande / mediano / pequeno. Teñen que diferenciarse ben os tamaños. É preciso deixarlles unha pestaniña por abaixo. 

4º-Recortar os chibos, dobrar a pestana de cada un e pegala, de xeito que os chibos se poidan levantar na paisaxe.

5º- Anotar se este conto me gusta, se me gusta solo un pouco ou non me gusta nada

Deixamos de novo a portada e o modelo co título e valoración por si queredes utilizalos de guía.

Nenas e nenos de Ed. Infantil 6ºB

"OS NOSOS SERES FANTÁSTICOS"

Neste tempo na casa non podíamos deixar de pensar nos seres fantásticos que deixamos no cole. Así que seguimos traballando arredor deles. Debuxamos ao noso Ser Fantástico favorito,  démoslle nome e construimos para eles fermosos fogares.
Aquí tendes unha mostra do que fomos creando.

Nenas e nenos de Ed. Infantil 6ºB

"A TARTARUGA QUE QUERÍA DURMIR"

Estamos na última semana de Maio e ao longo destes días imos traballar cos contos, contos que xa coñecemos e que fomos desfrutando ao longo destes 3 anos que compartimos todas e todos xuntos.
De luns a xoves faremos un pequeno rexistro, con diferentes tarefas, partindo do conto de cada día .
Hoxe luns, comezamos con “ A Tartaruga que quería durmir”, conto de Roberto Aliaga

¿Cal e a tarefa proposta despois de ver e escoitar este conto? Aquí a tendes:

1º- Escribir o título do conto

2º- Debuxar a portada

3º- Anotar se este conto me gusta, se me gusta solo un pouco ou non me gusta nada

Aquí tendes a foto da portada do conto e o modelo de rexistro para esta tarefa, vos axudarán a realizala.

Nenas e nenos de Ed. Infantil 6ºB

"FELICIDADES LAURA"

Laura, xa tes 6 anos. ¡¡¡MOITAS FELICIDADES!!!. Hoxe tócache a ti estar de celebración. E tamén contigo están mamá e papá, porque fai 6 anos puideron coñecerte.

Aínda que xa poidamos saír pasear, todavía temos que celebrar os cumples deste xeito especial. Así que, aquí te deixamos un fermoso agasallo que os teus amigos e amigas prepararon para ti con todo o seu cariño.

Sabemos que te vai gustar moito e todas e todos  imos desfrutalo neste día contigo. 

Grazas por permitir que o compartamos.

E aínda que sexa de xeito virtual, así é o xeito no que che imos cantar

¡¡¡FELICIDADES LAURA!!!

Nenas e nenos de Ed. Inf. 6ºB

"MÚSICA E XOGOS TRADICIONAIS"

Xa estamos a venres, temos que prepararnos para a fin de semana. Así que toca mover o corpo cunha canción de Brinca Vai titulada "Meu o mundo é", a ver si recoñecedes os lugares que aparecen no vídeo. Podedes cantala e bailala.

E imos seguir con Xogos Tradicionais, agora coas propostas de Psicomotricidade que nos enviaron as mestras Natalia, Ana e Rosi para esta ocasión. Desfrutádeas en familia, tamén no sábado e domingo.

Estas propostas tamén podedes atopalas no apartado "Tempo na casa" en Psicomoticidade 7.

Nenas e nenos de Ed. Infantil 6ºB

"PINTANDO CON MIRÓ"

E coas formas e as cores chegamos a Miró, vimos algúns dos seus cadros e fixemos fantásticas reproducións dalgunha das súas obras. ¿Queredes velas? Aquí as tendes:

Nenas e nenos de Ed. Infantil 6ºB

"TRES EN RAIA"

Sabemos o importante que é XOGAR, forma parte da vida de todas as persoas, sobre todo nos primeiros anos, na vosa idade é fundamental.

Ás veces xogamos sos, outras en parella e moitas en grupos.

Hoxe queremos propoñervos a elaboración dun xoguete para utilizar en parella, seguro que na vosa casa hai alguén que o coñece: "Tres en Raia".

Imos empezar cun pequeno vídeo no que explican os pasos para crear este xogo:

Agora toca facer o voso:

- Debuxar nunha folla un modelo do Tres en Raia e facer tantos cadrados como aparecen no vídeo

- Recortar o taboleiro e pegalo nun cartón, cartolina... que sexa algo máis grande, de xeito que quede unha marxe todo arredor.

- Escribir, onde se vexa ben, o nome do xogo "TRES EN RAIA"

- Deseñar as 6 fichas, 3 cun modelo e 3 con outro diferente. O deseño non ter que ser igual ao que aparece no vídeo. Poden ser animais, caras, froitas... Podemos facelas no material que queiramos.

- Decorar as 6 fichas

E... a xogar!!!

Nenas e nenos de Ed. Infantil 6ºB

"AS LIÑAS E A XEOMETRÍA"

Ao longo do mes de Maio estivemos afondando arredor da Xeometría: na casa, na rúa e nas obras de diferentes pintores. 

Xogamos coas liñas, as cores e as formas e aquí temos unha mostra con fermosos resultados.

Liñas pechadas

Nenas e nenos de Ed. Infantil 6ºB

"XOGOS TRADICIONAIS"

Como estamos na Semana das Letras Galegas, hoxe imos continuar facendo un repaso por algúns  Xogos Tradicionais. 

Seguramente as persoas adultas das vosas familias coñecen a maioría deles ou algún outro parecido. Tamén é posible que xogasen a eses xogos cando eran nenas e nenos coma vós. Preguntádelle  cales.

Aquí temos un vídeo feito por Francisco Rodríguez sobre xogos tradicionais nos que participan nenas e nenos dos "CEIP Mosteiro de Caveiro e CEIP de Piloño"

Despois de ver os diferentes xogos, imos elixir entre os que aparecen no vídeo e os que  recorden papás, mamás, avós, avoas... os 3 que máis nos gusten.

Agora que xa o temos decidido a tarefa consiste en:

- Escribir o nome deses 3 xogos 

- Escribir o nome dos obxectos que precisamos para xogar a cada un deles. 

- E para rematar, debuxar eses obxectos.

Nenas e nenos de Ed. Infantil 6ºB

"OS MAIOS 2020"

Este ano chegou o día dos MAIOS e non foi posible ir a escoitalos na Praza da Ferrería, pero aínda así, conseguimos  deseñar e elaborar uns Maios en casa realmente fermosos.
Podedes comprobalo na seguinte presentación, na que temos unha mostra do gran traballo feito ao longo de varios días. 

Nenas e nenos de Ed. Infantil 6ºB

"XOGANDO COAS LETRAS GALEGAS"

Imos continuar esta semana xogando coas Letras Galegas.

As profes Ana, Natalia e Rosi fixeron para nós unha selección de recursos e elaboraron unha actividade LIM para aprender xogando con algúns dos escritores e escritoras máis coñecidos homenaxeados nas Letras Galegas.

Para empezar imos desfrutar coa seguinte canción de "Uxía Lambona e a Banda Molona" titulada "Verdescente"

E despois de bailar con eles aquí tendes un LIM para coñecer mellor algúns dos escritores e escritoras galegos

Nenas e nenos de Ed. Infantil 6ºB

"LETRAS GALEGAS 2020"

Onte, domingo 17 de Maio, foi o "Día das Letras Galegas". Para Piquín é unha data importante e non quixo deixala pasar sen facervos unha proposta especial.
Esa proposta especial ven sendo a nosa tarefa de hoxe. 

Este ano, as Letras Galegas están dedicadas ao escritor Carvalho Calero, así que en Bibliopiquín tendes un vídeo sobre a súa vida e tamén un poema. 

E ademais, tendes unha presentación con fotos dos autores e autoras homenaxeados ao longo dos anos a partir da cal fai Piquín a súa proposta: realizar un retrato dunha desas persoas  caracterizada como Ser Fantástico Coidador da Lingua.

Fixádevos ben nas últimas fotos da presentación, porque seguro que algún será coñecido.

Clicade na seguinte imaxe e chegaredes axiña, Piquín espera con moita ilusión as fotos dos vosos traballos.

Nenas e nenos de Ed. Infantil 6ºB

"FELICIDADES NUNO"

¡¡¡Moitas Felicidades Nuno!!!. Estamos a 16 de Maio, é o teu día. Xa chegaches aos 6 anos. 

Parabéns tamén para papá e mamá, porque nun día coma hoxe poidestes coñecervos por fin, xa pasaron 6 anos desde ese momento.

Seguimos celebrando os cumples de xeito especial, aínda non podemos celebralo todas e todos xuntos no cole, pero igualmente temos un agasallo para ti. 

Sabemos que o desfrutarás moito porque está feito con todo o agarimo dos teus amigos e amigas. 

Moitas grazas por permitirnos compartilo.

E... por suposto, non podemos deixar de cantarche, aínda que sexa por este medio Virtual!!

¡¡¡FELICIDADES NUNO!!!

Nenas e nenos de Ed. Infantil 6ºB

"DÍA DA FAMILIA"

Estamos en venres, 15 de Maio, e hoxe celébrase o "Día da Familia". 

Todas as nenas e nenos do mundo teñen DEREITO a ter  unha familia que os queira, os coide e se preocupe polo seu benestar. Nese sentido todas as nosas familias se parecen.

Pero tamén é certo que cada familia é diferente, polo número de persoas que conviven, como están formadas, os seus gustos... porque hai "Unha chea de Familias" diferentes e Todas, Todas son igual de válidas.

Para celebrar esta data imos comezar cunha canción baseada no conto titulado xustamente: "Unha chea de Familias", de Xosé A. Neira Cruz. 

E continuamos a nosa xornada cunhas propostas enviadas polas mestras de apoio de Ed. Infantil para xogar en familia ao longo do día e da fin de semana.

Estas propostas tamén podedes atopalas no apartado "Tempo na Casa" en Psicomotricidade 6.

Esperamos que as desfrutedes moito

Nenas e nenos de Ed. Infantil 6ºB

"IMITANDO A YAYOI KUSAMA"

E para rematar esta semana de Arte viaxaremos ben lonxe, ata Xapón. Imos coñecer un pouquiño mellor a unha artista da que xa falamos fai algún tempo, Yayoi Kusama. 

Esta muller coñecida en todo o mundo, utiliza as formas redondeadas, os puntos e lunares para crear fantásticas obras como as que aparecen no seguinte vídeo:

A continuación tendes 2 das súas obras:

             

Observade ben, prestade atención ás formas, porque un dos elementos máis utilizados por Yayoi son como podedes ver os lunares.

A tarefa de hoxe consiste en facer o voso propio cadro cunha condición: que estea feito a base de LUNARES de cores.

Podedes facer unha paisaxe, debuxarvos vós, unha composición libre... o que queirades, pero tendes que encher a folla e estar feito ou decorado a base de lunares de cores. 

Utilizade os materiais que queirades: pintura, ceras, rotuladores, papeis variados para collage...

E cando teñades rematado, buscade un título e amosade o resultado para que todas e todos poidan desfrutalo.

Nenas e nenos de Ed. Infantil 6ºB

"XEOMETRÍA CON PAUL KLEE"

E imos con outro artista, desta volta alguén que chega de máis lonxe, Paul Klee, un pintor alemán ao que tamén lle gustaba moito xogar coas liñas e as formas. Para coñecer un pouquiño o seu estilo imos ver neste vídeo algunhas das súas obras.

Xa sabemos como pinta, agora veremos si somos quen de imitalo...¿que vos parece?

Fixádevos ben, ben nos seguintes cadros:

"PAISAJE CON PÁJAROS AMARILLOS"                                           "BARCOS EN REPOSO"  

¿Xa pensastes cal é o voso favorito?

Pois tendes que decidir. 

Porque como xa seguro que adivinastes imos reproducir o que máis vos guste. 

Pero... temos que facelo con outra técnica diferente. Imos facer un collage. 

Fixádevos ben nas formas, con liñas rectas e curvas, teredes que facelas en papeis diferentes, cartóns, teas... e logo pegalas a modo de collage. 

Tamén podedes  utilizar ceras e rotuladores para completar algunhas zonas ou encher de cor. 

Pero hoxe, a parte principal da tarefa será o collage. 

E por suposto, non esquezades poñer o voso título

Estou desexando ver as vosas obras.

Nenas e nenos de Ed. Infantil 6ºB     

"XEOMETRÍA CON MIRÓ"

Despois do traballo que levamos feito estes días, imos ver como os grandes pintores utilizan as formas, as liñas e as cores. No seguinte vídeo veremos algunhas das obras do Joan Miró, un dos artistas españois máis coñecidos. Fíxádevos na de figuras que aparecen nos seus cadros.

Agora os artistas imos ser nós. ¿Seremos quen de imitar unha das obras deste gran pintor?

¡¡¡Seguro que si!!! 

 Mirade CON ATENCIÓN os seguintes cadros:

               "EL JARDÍN"                                                     "CONSTELACIÓN: DESPERTANDO AL AMANECER"    

¿Cal é a vosa preferida?

Elixide unha delas e tentade reproducila. 

Utilizade diferentes materiais de pintura, (ceras, rotuladores, lápices de cores, pinturas líquidas e pinceis) para diferenciar os elementos que aparecen no cadro elixido.

Aínda que as 2 obras teñen cadanseu título, buscade un para a vosa.

Agardamos ver as vosas fotos.

Nenas e nenos de Ed. Infantil 6ºB

"LIÑAS ABERTAS E PECHADAS"

E para comezar esta nova semana imos xogar un pouquiño coas liñas. Seguiremos con "Xeometría" pero, desta volta, imos probar con algo diferente. Mirade o seguinte vídeo:

Agora tócanos a nós, pero en lugar de facer moitas liñas imos facer unha soa ¿como?...

Pois da seguinte maneira:

- Collemos un papel e un rotulador da cor que queiramos

- Empezamos no lugar do papel que máis nos guste e garabateamos sen levantar o rotulador
- Cruzamos dun lado a outro varias veces, trazamos curvas e rectas ata que decidamos parar
- Rematamos no punto de inicio

(Fixemos unha sola liña pero acadamos moitos espazos pechados diferentes)

- Para rematar coloreamos cada espazo pechado dunha cor, pódense repetir pero non quedar 2 cores iguais xuntas. 

A tarefa estará rematada cando a folla estea toda coloreada facendo un fermoso mosaico.

Aquí tendes algúns exemplos xa empezados que vos poden servir de modelo.

Nenas e nenos de Ed. Infantil 6ºB